Bhagwan ke nam par

bhagawan ke nam par
maine tumse aur tumne mujhse
kai salon tak batcheet nahin ki

bas allah-taala khush ho isliye
usne tumhari aur tumne uski
gardan par chaku rakh diya

sirf ishwar ke khatir ek-ek kar
harh-maas ke in nange putlon ko
tumne alag alag jaama pahna diya

aur khuda ka vaasta dekar tumne
bechari duniya ki satahon par
lambi-lambi lakeerein daal di,

kisiko desh kaha,
kisiko shahar, gaon, muhalla...

jaane anjaane, chahe anchahe,
apni banayi deewaron ke andar
tum khud qaidi ban gaye